Naturopplevingar året rundt

Veiledning

Valg for denne aktiviteten:

 Hovedside  Les veiledning  Legg inn data  Vis resultater

 Læreplanmål

Føremål

• Bli kjende med eit område og motiverte til å ta vare på det
• Oppleve og glede seg over naturen
• Observere årstidsendringar
• Skildre opplevingane

Gjennomføring

Opplevingsaspektet er ein sentral del av all miljølære, og det er ei viktig inspirasjonskjelde for engasjement. La elevane bruke sansane sine, registrere årstidssvingingar og prøve å skildre opplevingane sine. Å oppdage og oppleve den store variasjonsrikdommen i naturen kan vekkje interessa og ansvarskjensla hos elevane. Det er også ein viktig del av samfunnsplanlegginga å ta vare på varierte naturområde i nærmiljøet til folk.

1 Utforsk området med alle sansar

Gå på oppdagingsferd i området langs vatnet med opne sansar og legg merke til naturformasjonar, dyr og vekstar, lydar, lukter og spor etter dyr og menneske. Enkle sanseøvingar for å oppleve mangfaldet i naturen kan gjerast undervegs, til dømes:

• syn: Leit etter ting i området med ulike fargar og fasongar. Teikn ein regnboge og prøv å finne igjen alle fargane i naturen eller på gjenstandar i området. Bruk lupe for å studere detaljar. Kva er «stygt», og kva er «fint» å sjå på?
• hørsel: Lytt etter lydar. Er lydane naturlege eller menneskeskapte? Kva er lyd, og kva er støy? Kva slags lyd lagar vatnet? Lytt på suset i store sniglehus. Prøv å kjenne igjen dyre- og fuglelydar. Lag instrument av naturmateriale (strå, hole stenglar, pinnar, steinar).
• lukt: Finn fram til ulike lukter i fjøra eller vasskanten. Leit etter planter med ulike lukter. Kva slags lukt har vatnet? Kva slags lukt har jord og stein, og korleis luktar svaberg ved sjøen? Kva luktar godt, og kva luktar vondt? Kva slags lukter tenkjer de på når de hører uttrykket «frisk sjøluft»?
• smak: Finn etande vekstar med smak av surt, søtt, salt eller bittert. NB! Pass på å ikkje smake på giftige bær! Lag tangsuppe eller fiskesuppe. Tapp sevje av tre og lag sevjesaft.
• følesans: Gå berrføtt på ulike typar underlag (mose, svaberg, sand og liknande). Gjett på gjenstandar som er gøymde under eit teppe, berre ved å kjenne med fingrane. Finn glatte rullesteinar som er gode å halde i handa. Prøv å halde kravlande smådyr i handa. Finn ting som er mjuke, ruglete, harde osv. å ta på.

2 Skildring av naturopplevingar i området

Det er ikkje utan vidare lett å setje ord på ei naturoppleving. Prøv likevel å skildre kva de har gjort og opplevd i området, gjennom til dømes teikningar, songar, dikt, forteljingar eller dramatiseringar. Det kan ofte vere uventa tankar og observasjonar som dukkar opp.

Prøv også å fortelje kva de tykkjer om området. Alle område har ein estetisk kvalitet, men kva som er «vakkert» eller «stygt», er det ikkje alltid like lett å bli samde om. Eit område kan vere slik at dei fleste opplever det som vakkert. Tilsvarande kan dei fleste oppleve eit anna område som stygt. Både støy og søppel kan øydeleggje naturopplevinga i eit område. Korleis opplever klassen området? Dersom de ikkje blir samde, kva kan vere grunnen til at de opplever området ulikt?

3 Følg naturen året rundt

Bli kjende med området ved å bruke det fleire gonger gjennom året. Skriv gjerne inn til nettverket og fortel kva de har gjort ute, og kom gjerne med nyttige tips til andre. Både før, under og etter turen er det ulike tema å diskutere, aktivitetar å gjennomføre eller materiale å samle inn og studere. Framlegg til aktivitetar som kan gjerast på eit år:

• Måle temperaturen ute i vatnet gjennom året
• Følgje med i årssyklusen hos planter som veks ved vassområdet
• Følgje med i endringa av dyre- og fuglelivet ved vassområdet gjennom året. Kvar er dyra når de ikkje ser dei?
• Observere endringar i fargeskalaen i naturen gjennom året
• Skrive naturdagbok gjennom året
• Samle inn materiale til dekorasjon og forming
• Samle inn tang og tare, bær, sopp og krydder til matlaging
• Fiske med ulike reiskapar
• Lage bålplass til samlingsstaden ute
• Studere is- og snøkrystallar i lupe
• Byggje snøhytte og snølykter og lage isskulpturar
• Drive med isfiske eller skøyting på isen. NB! Pass på at isen er sterk nok.
• Observere vårteikn
• Lage seljefløyte

La også andre oppleve området til ulike årstider. Inviter gjerne andre klassar, foreldre eller nabolag til ei vandring langs elva eller stranda med innlagde informasjonsstoppar undervegs der elevane kan fortelje om årssyklusar, aktivitetar og tema relaterte til årstida.

Tips

Undervisning utandørs krev gjerne litt ekstra planlegging vinterstid. Jamvel i dei eldste aldersgruppene kan felles gjennomgåing av det som trengst av varme klede og skor, vere ein føresetnad for eit godt utbytte av turen.

Skjema

Dette skjemaet kan du ta utskrift av og bruke når du jobber med aktiviteten.Når du er klar til å legge informasjonen inn i databasen, går du til registrer data.

Vis bare skjema