| Beskrivelse: | Stien frå Liavegen følgjer den gamle skulevegen mellom gardane Lie og Otternes den tid det var omgangsskule. Stien går i tett bjørkeskog. Han er tydeleg i landskapet og delvis merka. Området har geologisk særpreg og vert årleg besøkt av geologistudentar ved høgskulen i Sogn og Fjordane. Bergrunnen er av Fyllitt. Fyllitten har mange stader djupe sprekker, såkalla joer. Dette er eit særpreg for området og ein av grunnane til at området er svært geologisk interessant. Ei joa som me kryssar langs «skulevegen» har namn Salmebok-joa fordi ein liten gut miste salmeboka oppi på veg til skulen.
Stien tek av frå «skulevegen» bratt nedover mot Legehola og fjorden. Det er denne delen som er vanskeleg å finna. Stien må ryddast. Initiativet til at elevar i 5.klasse kan gjera dette, kom frå Nærøyfjorden Verdsarvpark. Når stien er rydda, vil dei merka ruta og setja opp opplysningsskilt. Langs denne delen av stien møter me på spor av ei gammal tømmerrenne der det vart frakta tømmer frå skogen høgre oppe og ned til fjorden . Her er tømmerrenna ei tydeleg oppmura renne i skogen. Sjølve Legehola er ei stor hole / grotte / joe i fjellgrunnen. Namnet Legehola har ikkje noko med lege å gjera, men kjem av at området ho ligg i heiter Legene. Bøndene som eig området kjenner ikkje til at hola har vore brukt til noko spesielt, men ho er geologisk spesiell og spennande å gå inn i. |
