Skiregistreringar på Stall, Lindås kommune

Under krigen vart det produsert ski til eige bruk og noko for sal på Stall i Austfjorden. No er det berre grunnane som står att etter huset i bakken ovanfor Magne Stall sitt hus. Reidar Stall fortel at det eigentleg var ein husmannsplass som vart kjøpt på Svindal og flytta til Stall. Fyrst brukte dei han som hønsehus, men fekk sidan overta huset til verkstad. Det verktøyet dei ikkje hadde, måtte dei laga sjølv, og det var mesteparten.

Dei hogde høvelege tre som bjørk, ask, furu og rogn i skogen.

Dei drog trea ned til sjøen.

Dei hengde trea etter båten og fekk dei på saga. Dei måtte til Andås, Kvingo eller Fammestadvågen for å skjera.

Så måtte materialane tørka lenge. Det var om å gjera at planken var så brei at dei fekk vekk margen. (sjå teikninga øverst)

Først bruka dei øks, høvel og anna verktøy for at skia skulle få den forma dei skulle ha. For å få til den fine kjølen framom og bakom bindingen, bruka dei ein shulp. Kjølen var viktig for at skia skulle verta stive men samtidig lette og gode. Det vart bruka ein mindre shulp til styreranda under skia. Så var det å pussa, beisa og lakka.

Stålkantar kunne vera godt å ha i mange høve. Desse kjøpte dei i metervis. Det var svært viktig å få til eit godt res på skia. Reidar fortel at dei studerte artiklar av Laila Schau Nilsen for å læra seg svingteknikkar; Christianiasving, plog og stemsving. Dette prøvde dei på Kjellrusfjellet og i Austefjellet.